VERSKEIE atlete van Boishaai het verlede Vrydagaand tydens hul 40ste Uitnodigingsatletiekbyeenkoms op die Brugstraat-baan gewys dat hulle hierdie seisoen op hoër louere kan aanspraak maak.

Hulle het meegeding teen seunskole soos SACS, Rondebosch, Wynberg, Drostdy en Paul Roos en uit die 49 items met 25 eerste plekke, 20 tweede plekke en 7 derde plekke weggestap.

Die o.17-veldatleet, Thomas du Toit, het in gewigstoot, hamergooi en skyfwerp koning gekraai en met die hamergooi-poging (945 tabelpunte) die titel van beste veldatleet verower.

Wikus Groenewald, o.15- veldatleet, het ook in sy ouderdomsgroep dieselfde as Du Toit vermag en met die eerste plekke weggestap.

Die atlete wat in die onderskeie ouderdomsgroepe die beste gevaar het (eerste drie plekke) en die meeste tabelpunte opgestapel het, is (o.14) Gianni Lombard (100 mH - 806 en 100 m - 715), Manual Ross (100 mH - 764). (o.15) Wikus Groenewald (gewigstoot - 865, hamergooi - 838 en skyfwerp - 825). (o.16) Ruan Gomes (400 mH - 777, 400 m - 736) en Zach Snyman (110 mH - 739). (o.17) Thomas du Toit (hamergooi - 945, gewigstoot - 861 en skyfwerp - 829) en (o.19) Niel Maritz (110 mH - 819) en Craig du Plessis (100 m en 200 m beide 790).

Khanya Ncusane het die o.14 300 mH gewen in ’n nuwe rekordtyd van 34,9 sek.